Бір бай үйіне қонақ шақырып, ас беріпті. Олардың арасында бір кедей де отырыпты. Дастархан басында отырған ақсүйек, байлардың алдына үлкен балық, ал өзінің алдына кіп-кішкентай балық салынғанын көріп, кедей қатты ренжейді. Содан соң балықты қолына алып, құлағына әлденелерді сыбырлай бастайды. Сыйлы қонақтар аң-таң болып, не сыбырлағанын сұрайды. Кедей:
- Әкем балықшы болған еді, бір күні суға кетіп өлді. Балықтан "әкемді көрмедің бе?" деп сұрап жатырмын, - дейді. - Ал балық маған: "Мен кіп-кішкентай балықпын, оны қайдан білейін? Ана табақтардағы үлкен балықтардан сұра. Олар менен ересектеу, мүмкін солар білетін шығар" - деп жатыр.
Үй иесі бай ұялып, кедей қонақтың алдына да үлкен балық әкеліп қойыпты.
Авторы: Пернегүл Үсенова